KUCHING: Kunsil Pengawa Bepilih (SPR) ngelalau semua parti politik ke betapi ba pengawa bepilih besai menua ti ke-13 (PRU 13), meri kerejasama dalam atur bekimpin maya PRU-13.
Sapit Chairman SPR Datuk Wira Wan Ahmad Wan Omar madah, isu ti besai ke seruran ditapi SPR iya nya parti politik enda nitihka atur bekimpin baka lebuh nirika menira tauka tambai enggau sekeda perengka bukai kena bekimpin.
“Ngarapka maya penerang tu, jaku lalau kami datai ngagai semua pengari parti politik di menua tu,” ku iya ba mua urung 40 iku pengari parti politik ba penyikap PRU 13 di sebengkah hotel antarabansa ditu, kemari.
SPR minta kerejasama ke tegap ari semua parti politik ngambika pengawa PRU13 ulih dipejalaika enggau likun nyengkaum maya bekimpin, tiap iku rayat dipinta bebasaka undang-undang menua tu, ku iya.
Iya nambah nyangka SPR deka ngatur penerang ungkup parti politik menua tu ba atur ke patut dititih maya bekimpin tauka maya muai undi.
“Baka nya mega enggau kimpin poster enggau tambai bechuntoka pengawa bepilih ke udah, kami ngelalau parti politik ke ngena leka jaku sida empu, minta tulung kita mega nyalin ngagai jaku ke ditemu genap raban bansa. Laban kimpin kitai ukai semina nuju sesebengkah bansa aja,” ku iya.
Iya madah, jaku enggau manifesto ke ditulis di atas tambai patut ditulis sereta disalin ngagai dua tauka tiga macham bansa jaku ngambika jaku pesan tauka lalau nya datai ba semua komuniti, lalu enda nyadi isu bansa udah nya ila.
Ba pengawa parti politik ngena media perintah ngenataika manifesto kimpin sida iya, ku Wira Wan Ahmad: “SPR besetuju enggau komiti ke dipilih parlimen, media Perintah mesti adil ngagai semua parti politik ba tabur berita.
“Kami udah besetuju enggau Opis Menteri Pemadah ngungkup tabur berita dibungkur RTM nyengkaum agensi berita nasional, Bernama. Tang taja pia, kitai patut masa media perintah tu ke diempu Perintah ke diatu.
“Tu polisi perintah ari maya Merdeka kelia. Media Perintah tanggungjawab perintah ke megai menua diatu. Nengah media perintah tu meh Perintah ulih meri pemadah pasal semua polisi perintah,” ku iya.
Iya madah baka tu ba aum media ti diatur SPR sepengudah meri penerang ngagai pengari parti politik ba penyikap PRU13 tu ila.
Wira madah baru, kebuah media perintah terit enggau atur tabur berita laban enggaika berita ke ditabur nya enda nitihka atur sereta tau mai penyarut ngagai rayat enggau menua.
“Atur ke terit sigi berat sebedau berita nya ditabur tauka dikeluar. Jaku Menteri Besai pen ditapis sebedau iya ditabur,” ku iya.
Nya alai, ku Wira Wan Ahmad, parti penyakal patut beratika isu tu enggau chara ke positif laban peluang sida iya mayuh agi alai mantaika manifesto lebih agi nengah media elektronik.
“Enti diberi 10-15 minit pen udah manah endar nya. Baka nya mega penyampau timpuh ke diberi ngagai Perintah,” ku iya.
Kelimpah ari nya mega, iya madah, SPR udah nuduh lima buah NGO ke diasuh nydi pemerati ba pengawa PRU13 tu ila.
“SPR pen bisi mai sereta pemerati ari menua Asia bukai, lalu nyangka seiku tauka dua ari NGO antarabansa beratika PRU13 tu ila,” ku iya.
Iya madah lima buah NGO ari menua tu semua bepalan di Kuala Lumpur lalu SPR mega meri kelala 4 buah NGO ke deka nyadi pemerati ke zon Kuching.
“Empat buah NGO ke dituduh nyadi pemerati nya, Gerempung Melayu Sarawak, Gerempung Orang Ulu, Gerempung Nembiak Islam Nasional (Pembina) enggau Gerempung Nembiak Sarawak,” ku iya.
Iya nandu, SPR mega deka nuduh pemerati ke sebaka pengawa sida iya, ke pelilih Sibu enggau Miri.
“NGO tu dipilih atas pengawa sida iya ke enda ngarika sebarang parti politik. NGO baka tu deka diberi basa nyadi pemerati kelimpah ari dikemendarka tama ngagai palan muai undi.
“Kami enggai nuduh NGO ke bisi bekaul enggau parti politik laban enggaika sida iya bekimpin. NGO ke dipilih nadai bekaul enggau parti politik,” ku iya.
Iya madah pemerati tu deka beratika semua utai ke nyadi dalam PRU13 belabuh ari parlimen diketu nyentuk ke pengabis PRU13.
“Dalam timpuh 30 hari, NGO tu diasuh ngaga riput ari utai ke udah diperatika sida iya. Taja pen empat NGO, tang gerempung deka gawa nengah siti payung ke besai,” ku iya.
SPR ngemendarka semina 10 iku pemerati dalam siti-siti sitak parlimen.
Di Sabah ku iya, SPR meri kelala tiga NGO ke deka mantu pengawa nyadi pemerati, iya nya Kunsil Nembiak Sabah, Gerempung Sejarah Sabah enggau Pampang Pro-Hem Sabah.
Ba atur pengawa kemari, SPR meri penerang ngagai raban penerit pengawa kimpin, returning officers, pengari parti politik, pemesai polis zon Kuching.
Dalam semua penyampau tu, SPR nuduh 64 raban penerit adat bekimpin ke menua tu. Sibu enggau Mukah enggau sekeda sitak bukai sama deka diberi raban tu.
“Tiap raban bisi polis inspector, pemesai pelilih menua, enggau pengari ari chalun ke bediri ba siti-siti sitak, lalu raban tu deka betuaika seiku pemesai SPR,” ku iya.
Sama bisi nguluka atur pengawa nya kemari, Direktor SPR pampang Sarawak, Datu Takun Sunggah enggau pengaril SPR Dato Mohamed Ramji Ali.