SIBU: Nyerumba Pengerami Mantaika Main Asal Borneo (BDCF) 2012, mayuh bengkah program ngerinduka ati deka diatur ba panggau Pengerami Mantaika Main Asal Dayak Borneo (BDCF) 2012 ke berengkah diatur ari 6 ngagai 15 Julai tu ila.
Chairman Komiti BDCF Kunsilor Tengku Geruna madah, BDCF serak tu disempulang program baru lalu diperambu deka rami agi ari taun ke udah.
“Semua program tu bepelasarka main asal tauka pengarap bansa Dayak ke nyengkaum Iban, Orang Ulu, Bidayuh enggau Punan.
“Tu siti ari chara kitai ngelakuka mengeri Sibu ba pengawa dagang temuai. Serak tu mega kitai bisi ngangauka Raban Soldadu Malaysia (ATM) mantaika pengelandik sida bepelasarka main asal Dayak,” pia ku iya madah maya aum media ditu ngagai pengarang berita, ensana.
Tengku ke mega Seketari Politik Kepala Menteri madah BDCF mungkal pengerami kena 6 Julai enggau pengawa bejalai bebala mayuh ke nyengkaum 50 iku bala Dayak seraya ngelai bejadika BDCF ke dilanchar Menteri Wang II Dato Sri Wong Soon Koh, pukul 6.30 lemai nya.
“Sepengudah nya, pekit Ngajat enggau Betabuh bagi kategori nembiak sekula diatur berengkah pukul 8.30 lemai sebedau pengawa miring, begendang, bebiau enggau pantun.
“Lemai tu mega, mensia mayuh ke bisi datai diperindang artis menua tu iya nya Lucy M enggau Gloria Oya ke disempulang band Red Hackle ari Batalion Ketiga Rejimen Renjer Diraja (3RRD),” ku iya nerangka.
Hari nangkan ke nya (7 Julai), ku Tengku komiti sida ngatur pekit nyumpit enggau batak tali lalu ngalihka malam, Menteri Muda Perengka Guna Mayuh (Karan enggau Telekomunikasi) Datuk Stephen Rundi Utom deka bejadika panggau BDCF lalu diperindang artis Gabriel Fairuz Louis.
“Kena 8 Julai, bala soldadu ari Infrantri 9 Briged deka mantaika pengelandik sida baka ‘tarian perang’, ‘tempur tanpa senjata’, ‘persembahan tambor gabungan’ enggau ‘persembahan tarian askar’ lalu dipejadika Panglima 9 Briged, Datuk Stephen Mundaw lemai nya kelimpah disempulang program ke bukai,” pia ku iya madahka baru.
Malam BDCF Sarakup Orang Ulu (OUNA) deka diatur kena 9 Julai berengkah 6.30 lemai.
Lemai tu ku Tengku mensia mayuh deka diperindang enggau artis Jolly Jengan enggau Gloria Oyo seraya ‘Male Dayak Junior Contest’ enggau main asal Orang Ulu bisi dipandangka.
Ku iya, Malam BDCF ungkup Sarakup Dayak Bidayuh (DBNA) belabuh diatur kena 10 Julai ari pukul 6.30 lemai lalu maya tu artis Harry Acid Rain deka merindang lalu Female Dayak Junior Contest’ enggau main asal Bidayuh dipandang ngagai mensia mayuh.
“Kena 11 Julai, Malam BDCF Orang Ulu diatur lalu dipenyadika Menteri Muda Main enggau Pengeraja Adal Liwan Lagang berengkah pukul 6.30 lemai.
“Lemai tu mega mensia mayuh kelimpah ari meda main asal Orang Ulu enggau Punan mega diperindang Rosiana Urai enggau Gloria Oyo.
“Hari siti, iya nya 12 Julai pekit renggat keterubah Pekit Kumang BDCF 2012 diatur belabuh pukul 6.30 lemai lalu disempulang bala mayuh beperindang enggau Melissa Francias,” pia ku iya nandu baru.
Renggat kedua pekit Kumang BDCF enggau renggat keterubah Pekit Keling BDCF diatur 13 Julai, pukul 6.30 lemai.
“Kena 14 Julai, pukul 6.30 lemai, pekit renggat kepenudi Pekit Kumang enggau Keling BDCF 2012 deka diatur. Kelimpah ari nya, kitai mega bisi mandangka main asal Dayak lalu pengawa tu dipejadika Sapit Kepala Menteri, Datuk Patinggi Tan Sri Alfred Jabu Numpang.
“Kitai deka ngatur pengerami nutup Panggau BDCF kena 15 Julai lalu maya tu komiti bisi mega ngatur pekit Tuak enggau pansuh.
“Kitai mega bisi nyuaka perais ngagai kedai Dayak ke pemadu madah enggau ngatur ‘Sponser Song’,” pia ku iya sambil nambah bisi 18 buah kedai Dayak deka bejualka mayuh bengkah bansa pemakai asal enggau ai irup sekumbang BCF ke diatur 10 hari tu.
Beduduk ari pekara tu, Tengku ngarapka mensia mayuh baik nya ari menua tu tauka menua luar ari mengeri Sibu ulih datai sampal ngulu BDCF.