Saturday, September 19

Chalun Parlimen Bintulu andal menang majoriti besai

0

BINTULU: Chalun Barisan Nasional (BN) Dato’ Seri Tiong King Sing andal ulih ngetanka penuduk Parlimen p.217 Bintulu maya Pengawa Bepilih Besai Ke-13 (PRU-13) tu ila.

Iya mansutka jaku tu ba aum pemberita ti diatur ba Opis Parti Progresif Demokratik Sarawak (SPDP) ba ditu sepengudah tembu pengawa ngantung nama chalun ti diatur ba Dewan Suarah Bintulu, bedau lama ke udah.

Ku iya, kenyau ari tiga penggal (1999-2013) ngetanka penuduk Parlimen Bintulu, iya meda rayat ba menua tu nadai kala bebagi ati ngagai Barisan Nasional (BN) kelimpah nyukung semua polisi pemansang ti diatur perintah menua enggau perintah besai ti ulih ngangkatka pengidup sereta nyungkak penatai pemisi rayat.

“Nya alai aku andal ulih menang enggau majoriti ti jauh mayuh ari ke udah maya Pengawa Bepilih Besai Ke-12 (PRU-12) 2008 suba,” ku iya.

Ku iya, taja pan mayuh isu udah dibantaika penyakal dikena ngeregau runding mensia mayuh kelebih agi bekaul enggau isu Tanah Adat Bansa Asal (NCR) Bumiputera tang semua kes tanah nya udah diputarka enggau jalai berunding sereta nitihka undang-undang tanah ba menua tu.

Nya alai ku Tiong, sema menang ba pengawa PRU-13 tu ila iya deka bebendar agi gawa ke rayat  kelebih agi ba pemansang sekula enggau infrastruktur dikena ngangkatka tikas pendiau.

“Polisi aku endang semampai deka ngemansangka rayat pupu raban bansa ti sama nguan menua Bintulu ngambika sama bela mansang dalam mayuh bengkah pengawa,” ku iya.

Menteri Dagang Temuai Datuk Haji Talib Zulpilip ti sama bela bisi dia mega madahka iya enggau raban parti komponen BN ti bukai endang nyaup Tiong maya kimpin sepengelama 15 hari tu ngambika BN ulih menang enggau majoriti ti besai.

Kebuah pia ku iya, nadai parti bukai kelimpah ari BN ulih meri pemansang ngagai rayat laban BN endang udah ngembuan peneleba megai menua sereta nemu ni bagi pemansang sereta utai dikedekaka rayat.

“Nya alai, aku ngarapka semua raban komponen parti BN ba menua tu terus besaup enggau pangan diri ngambika BN ulih menang 2/3 penuduk lalu terus megai kuasa sereta bejalaika polisi pemansang menua tu empu,” ku Talib.