KUCHING: Penumbuh gudang endur nempa jungkung enggau panel solar ti dikemujur Comtec Solar International Sdn Bhd di Samajaya ditu tau endar ngepunka pemansang industri solar.
Kepala Menteri Pehin Sri Abdul Taib Mahmud madah gudang nya ditumbuh ketegal pemisi perengka polisilikon ti diasilka Tokuyama Sdn Bhd di Samalaju, Bintulu.
Polisilikon ti diasil dalam genturung SCORE nyadi pengepun pemansang industri begaga sel sereta panel solar.
Ku iya, pengawa ke manah nya ulih mantu Sarawak nyapai ikas nengeri ke ngembuan penatai pemisi tinggi dalam timpuh ke semak.
“Ba pengawa kitai ti deka nyapai tagit nengeri ke ngembuan penatai pemisi ke tinggi kitai enda ulih semampai ngarapka industri betanam betupi sereta dagang temuai aja.
“Berindik ari nya, perintah sanggup beranakka puku ba pekara pemansang latih enggau pelajar ti bepelasarka pengelandik ngambika tau ngadaka modal mensia ti ulih nangkup pengawa industri intensif,”ku iya maya bejadi Palan Comtec Solar ditu, kemari.
Taib nandu, kelimpah tau ngangkatka ekonomi, SCORE mega benung ransing nyendiaka hab halal ti tau endar ngadaka awak kereja ngagai peranak menua tu.
Ngenang senentang Palan Comtec Solar, Menteri Pemansang Industri Datuk Amar Awang Tengah Ali Hasan madah, penumbuh dua palan solar nya di Samajaya tau matak orang dagang bukai beranakka puku ditu.
“Penatai Comtec Solar sereta MEMC di Sarawak, dua kompeni besai ba industri solar ngujungka nengeri tu dikelala raban orang dagang ari menua luar,”ku iya.
Seraya ti netapka pengawa Comtec Solar numbuhka gudang ditu nya seiti pemutus ti ngena, iya madahka diri bisi ninga berita dia kompeni nya bisi merambu numbuhka gudang di Semenanjung dulu agi ari tu.
“Entara kebuah Comtec Solar milih numbuhka gudang di Sarawak iya nya ketegal ungkus pengawa ngaga panel ti kompetitif, insentif beranakka puku ti manah, perengka guna ke chukup sereta pemanah kaul perintah Sarawak,”ku iya.
Ba kaul nya mega, Chairman Comtec Solar John Zhang madah palan nya digaga ba tanah sepemesai 40 ekar nengah ungkus RM1.2 biliun.
Ku iya, renggat keterubah loji deka tembu digaga sebedau pengujung taun 2013 lalu deka mekal panel solar mono bansa N nengah pengelaju satu gigawat setaun.
“Palan di Samajaya deka nyadi gudang pemansut solar mono pemadu besai di dunya.
Enti semua proses udah tau dipejalai, gudang tu deka begunaka 1,300 iku pengereja pengawa,”ku iya.
Comtec Solar nyadi sebengkah kompeni ti udah dipasuk dalam papan besai Bursa Saham Hong Kong kenyau ari taun 2009 lalu dipejalai ari opis besai di Shanghai kelimpah ti ngembuan gudang ke sama di Shanghai enggau Hai An.
Bela datai, bini Kepala Menteri Puan Sri Ragad Kurdi Taib, Sapit Kepala Menteri Tan Sri Alfred Jabu Numpang, Menteri Pemansang Tanah Tan Sri Dr James Masing enggau Menteri Muda Pemansang Industri Julaihi Narawi.