KUCHING: Naka pukul 8.00 pagi kemari, pemayuh palan pengenduh mensia ke betapi enggau tasah ampuh bah agi mengkang tiga buah buah, iya nya di Dewan Sukan Tatau (Bintulu), Dewan Masyarakat (Bakong, Miri) enggau SK Kpg Iran, Niah (Miri).
Menteri Pengintu Pengelantang Pendiau, Pekara Indu enggau Pemansang Ruang Bilik, Datuk Fatimah Abdullah madah, ari ungkup statistik, pemayuh orang ke dipindah sereta bantu ke udah diberi belabuh ari 20 Disember 2013 datai ke diatu, manggai 137 sitak mungkur Miri, Sri Aman, Bintulu, Samarahan, Kuching, Betong, Sibu, Mukah enggau Sarikei.
“Ari ungkup statistik, bantu bela diberi ngagai sida ke pindah ngagai palan pengenduh orang ke kena ampuh bah nyengkaum sida ke enda pindah laban jalai nuju ngagai rumah sida iya kena ampuh bah.
“Sida ke enda pindah pan bela dibantu laban nadai jalai sida iya deka nurun ngulihka pemakai laban jalai nuju rumah sida iya kena ampuh bah,” ku Fatimah.
Pemayuh ruang bilik ke kena tasah bah manggai 3,795 lalu pemayuh itung pala manggai 21,164 lalu penyampau bantu ke diberi naka tu ari ungkup kos pemakai bekal pemakai rangkai, RM215,045 (ke enda nyengkaum kos pengangkut).
“Ungkup wang enda diberi, semina ensana ari Yayasan Kebajikan Negara ke diberi nengah Menteri Pekara Indu enggau Pengelantang Pendiau, Dato Sri Rohani Karim, tang ari Kaunsil Tasah Bansa, bedau meri,” ku iya.
Ba Ampuh Gelumbang Kedua di Sarawak, ke dijangka deka nuntung menua tu, sebedau Taun Baru China enggau maya Taun Baru China nya empu, Fatimah madah semua penyendia udah digaga sebedau ujung taun nyin tadi.
“Pemakai sereta palan pengenduh mensia mayuh ari tasah ampuh bah udah disediaka magang, nyengkaum pengangkut, nitihka rikod ke bisi baka ke diatu.
“Taja pan enda ampuh bah, tang jalai ngagai sekeda sitak menua kena ampuh bah, baka ngagai menua ulu, pan bela deka dibantu,” ku iya.