MIRING: Tuai Rumah Jenggut (bediri kiba) bebiau maya miring ke Datuk Kristoffer Nyuak (duduk atas tawak).
Atur pengawa beserumpu di rumah iya kena nyempil diri enggau peranak di sitak Pelagus
KAPIT: Seiku Kaban Kaunsil Tinggi (SC) Parti Rakyat Sarawak (PRS), Datuk Kristoffer Nyuak Bajok bisi ngatur pengawa sererumpu Taun Baru 2014 ba rumah iya di Jalai Selirik ditu malam Hari Enam tu tadi.
Lebih ari 100 iku temuai sereta pengabang bisi datai nyengkaum 30 iku tuai rumah ari kandang menua ke semak dia lebih agi di Sitak Pelagus ba rumah iya meri Selamat Taun Baru ngagai iya (Kristoffer).
Nundaku Kristoffer, gempuru nya diatur dikena ngerami taun baru begulai enggau bala bakih sereta orang mayuh ari macham bengkah bansa nyengkaum Iban, China enggau Orang Ulu.
“Aku ngajihka sida seruran gerai nyamai, lantang senang kaya raja dalam taun 2014 nya kebuah aku ngatur gempuru sekali tu,” ku Kristoffer ke mega seiku orang dagang ke tebilang ditu.
Kelimpah ari nya aku gagit ati enggau bala bakih sereta peranak di Kapit seraya semua sida nya nyamai enggau begulai.” tambah iya.
Bejaku ba pengerami nya, Kristoffer madahka diri deka terus nemuai ngagai mayuh bengkah rumah panjai di menua pesisir baka nya mega di bandar laban deka betemu enggau rayat ba tikas baruh di sitak Pelagus minta sukung ari sida.
“Nadai utai dipelalai agi. Aku minta sukung pengundi enggau kaban parti ngambika aku tau bediri nengah tikit BN ba pengawa Bepilih Besai Nengeri tu ila.” tambah iya.
Sekeda orang ke bisi meri jaku maya nya, TR. Melintang, Tr. Jenggut, Tr. Gendang, Tr. Lanying, Tr. Taba, Tr. Lita (tuai rumah Beketan), Tr. Meliyu, Tr. Bundong, Tr. Madang enggau Datuk Yong Hua Syiing (ngarika NGO China).
Bela datai orang dagang ke tebilang Bangsa Untang; SAO Nuwin Lium; Kepala Polis Pelilih Mit Kapit Entusa Imam; Pemesai Opis Pemadah Pelilih Kapit Koh Kumbong; Penghulu Uga Esop enggau sekeda orang dagang bansa China enggau Iban.
Lemai Hari Minggu, 5 Januari, 2014 Kristoffer merambu ngelawa Rumah Pengulu, Nanga Senuang, Batang Rejang.