BEGULAI ENGGAU KETUAI BUKAI: Masing (tengah) begulai enggau tiga iku ketuai raban bansa ke nerima surat chiri, Neo (empat kiba), Yong (lima kiba) enggau Tan (empat kanan), Elvis (lima kanan) sereta ketuai raban bansa bukai.
KAPIT: Menteri Kanan ke mega Menteri Pemansang Tanah, Tan Sri Datuk Amar Dr James Jemut Masing ma-dah, raban Dayak patut berani sereta belajar ngelaban pekara ke salah tauka ngelaban kena negi hak nyadi peranak menua Malaysia.
“Aku deka ngelalau raban Dayak, anang nejuka orang ari luar ngungkung runding kita.
Enti enda pia, kita diindik raban orang ti semampai ngiga pengelemi sereta peluang mambarka bansa kitai,” ku iya lebuh ke bejaku ba Pengerami Makai Lemai ti diatur SADIA Ru-ral di Dewan Sri Baleh ditu malam kemari.
Ku Masing, lebuh ti numbuhka menua Malaysia suba semua pupu raban bansa disemayaka hak sida nengah undang- undang, lalu baka nya mega raban Dayak.
Lebuh ke ngenang jaku tangkan Sapit Kepala Menteri Tan Sri Alfred Jabu Numpang ti dipansutka ba sebengkah su-rat kabar ensanus, bala ketuai parti politik ari raban Dayak dipinta anang belaya tauka beserekang penemu enggau pangan diri ketegal politik.
Masing ngaku engka amat bisi laya tauka beserekang penemu ba bala ketuai raban Dayak, tang pekara nya enda panjai nyadi enti nadai orang ari luar ke nyadi pengachau tauka bisi kaul bukai enggau pekara nya.
Berebak enggau pengerami nya, Masing nyuaka setipikit chiri tiga iku ketuai raban bansa China ditu iya nya Te-menggung Tan Kian Hoo, Pemancha Yong Thu Fook enggau Kapitan Neo Hing Chu (ungkup kandang menua Merit).
Masing mega ngelalau ketuai raban bansa semampai nyukung pengawa perintah ti ngemansangka rayat.
“Ketuai raban bansa nyadi jematan ke pemadu beguna penyambung rayat enggau perintah,” ku iya.
Beserimbai enggau nya, Chairman SADIA Rural, Seta Engkah madah, pengerami nya diatur kena meri terima kasih ngagai semua komiti pengatur pengerami Mantar Gawai 2014 ke udah diatur kena 17 Mei tu tadi.
Bela bisi ngulu pengerami nya,Datuk Kristoffer Nyuak Bajok, DO Kapit Elvis Didit, Chairman Balai Dagang China Kapit, Datuk Yong Hua Syiing, bala Kaunsilor, bala ketuai raban bansa enggau pengari ari gerempung ukai dikuasa perintah (NGO).
Pengerami nya digulu lebih 200 iku temuai.