Suah agi ngatur program lumba ngambika rayat seruran regas sereta mai orang bukai nyereta sida
KAPIT: Kaban Kunsil Nengeri (ADUN) N.63 Bukit Goram ke baru dipilih, Jefferson Jamit Unyat meransang kelab lumba, serakup nembiak enggau Gerempung Ukai Dikuasa Perintah (NGO) ngambika ngatur program lumba dikena ngelakuka gaya idup bepengerai ngambika seruran regas sereta mai orang bukai nyereta sida.
“Perintah ngelakuka gaya idup bepengerai dikena meransang rayat regas ngaul diri dalam eksesais batang tubuh ngambika seruran gerai.
“Perintah nengah mayuh bengkah ejensi baka Opis Lumba enggau Nembiak, Opis Menteri Pengerai, sekula enggau ke bukai seruran ngatur aktiviti lumba baka eksesais aerobik, 10,000 singkang sehari, hari lumba sekula ninting taun, sereta ke bukai.
“Semua tu sebagi ari nyerenih penau enggau pengerai, ngelalau kitai pangka ba pengerai ti dikelala 3R; darah tinggi, obesiti sereta kolesterol,” ku Jamit.
Ku iya, nyadi pengari rayat, iya sigi nyukung aktiviti lumba. Kelimpah ari pengerai, iya mega deka ngaul rayat begulai sereta nyadi pengawa ke tau nyeliahka diri ari penanggul rama, lumba dikelala nyadi perengka pemadu iya manah dikena ngaul rayat begulai.
Bepelasarka rayat datai ari pupu bansa tauka jalai pengarap, sida deka datai begulai nyereta pengawa tu. Di Kapit, main badminton chukup dikerindu lalu iya dimain semua raban bansa.
“Nya alai, aku meransang mayuh bengkah kelab lumba, serakup nembiak enggau bala NGO ngambika ngatur mayuh agi aktiviti lumba dikena ngelakuka gaya idup bepengerai ungkup pengeregas sereta ngemai rayat begulai sama,” ku Jamit kena lemai Hari Dua lebuh bejadika ‘Inter-Teams Tai San Ten Association Badminton Challenge Trophy’ diatur bepalan ba Stadium Bletih, berengkah ari 19 ngagai 24 Julai.
Kapit tu menua ke mit tang kitai bisi mayuh bansa China bepelasarka NGO di pasar tu. Semua sida tu piak bekaul ti bejalaika tanggungpengawa diri ngintu pengelantang enggau peminta kaban sida.
“Aku deka minta sida tu ngatur mayuh agi pengawa lumba baka badminton, futsal sereta ke bukai ngambika matak komuniti bukai nyereta iya. Dalam pengawa ngemai bala komuniti begulai dikena ngedutka kaul enggau kerejasama,” ku Jamit ngansak.
Pengudah nya iya bisi ngagihka belanja penyampau RM6000 ungkup atur pekit badminton nya.
Maya Jamit ngulu pengawa sehari nya, penatai iya udah diambat bala ketuai ari mayuh bengkah NGO, menijar tim sereta bala pemain.
Bela bisi nyempulang Jamit iya nya Pemesai Opis Pekara Khas (JASA) Sapit Menteri Pemansang Menua Pesisir enggau Kandang Menua Datuk Alexander NantaLinggi, Ambrose Abong Bugek, Kaunsilor Chu Sing Lung, Kaunsilor George Tang, Kunsilor Ma Bee Kuan, Kapitan Yap Hui Le, Chairman Tai San Ten, Kong Siau Kui, Chairman Pengatur, Jason Yeo, Chairperson Serakup Chiang Chuan, Sng Geok Yien, Chairman Serakup Tai Chi, Ma Tian Kock, Chairman Serakup Kwang, Lee Kung Chen, sereta bala bukai.
Taun tu bisi enam tim iya nya Starlight, Magna, Betek, Asia Vision, Black View enggau Tian Huat bepekit berebutka ‘Inter-Teams Tai San Ten Association Badminton Challenge Trophy’.